عندنا
شباب زى الورد بس الاسطورة بتقول ان اختيار وزير _ ممن يستطعون التبول دون حرقان _
ذنب عظيم يلقى بصاحبه بلا شك فى قعر الجحيم ليمكث فيها الى ان يحمر الرطب او يزهر القصب
*************************************
لا
يمكن ان تتساوى الهمبكة مع الانجاز الحقيقى الا فى عيون تعشى بالنهار والعشى هنا يتأتى
من طريقين اما عين كسر ..او .. كسر عين ؟؟!!
************************************
مع
انهم مورفولوجيا اكثر من الهم ع القلب لكن بالامانه اللى يعرف طريق راجل بجد يدلنى
عليه وله منى فلاشة 16 جيجا ادعية دينيه
***********************************
مصر
دى شجرة كبيرة طراحة مضللة على الكل المشكلة بقى فى ولادها اللى كل واحد فيهم ماسك
فاس وبيقطع فى جدورها علشان يولع ويعمل كوباية شاى ويرص كرسى معسل ؟؟!!!!
**********************************
الأوقاف:
قوافل لنشر الدعوة «المستنيرة» في الوديان الجبلية بجنوب سيناء ….. يذكرنى هذا الخبر الجلل بواحد ضاع منه فلوس فى شارع
ضلمة راح يدور عليها تحت عامود النور فى شارع تانى ؟؟؟؟!!!!!!!
*********************************
خطاويك
فى الخير بتعلى مقامك
ومهما
قصرت هى الخطاوى الطويلة
خطاويك
فى الشر هتدغدغ عظامك
مفضوحة
اللعينة ولو فى تياب الفضيلة
*******************************
بصراحة
متفهم جدا ليه شعوب العالم الثالث البائسة لازم تستهلك هذا الكم الرهيب من المخدرات
بكل اشكالها وحركاتها وتكاتها.. لان هذة الخلايق -يا حبة قلبى- لو ادركت الواقع ؟؟!!
لانفجرت
******************************
كلنا
يدعوا الله فى صلاته .. اهدنا
الصراط المستقيم ..
وعند التطبيق العملى يفضل اغلبنا سكه ابوزيد اللى كلها مسالك
******************************
اجتهد
جديا ان احافظ على شعرة معاوية تربط بينى وبين بعض البشر السقيم وان كنت اعتقد ان ولا
زعافة شعر المرحوم بوب مارلى بشروشها ممكن تحوق مع سماجة ابوهم
*****************************
مش
اسلوب ابدا انك لما تحب تربى اولادك وتعدل سلوكهم انك تجيب خرزانة وتدور فيهم الطحن
عمال على بطال لازم هتحتاج تتكلم معاهم شوية حتى ولو فى البريك بين كل علقة وعلقة ؟؟!!
****************************
لست
مضطرا لان تتبنى نظرية ان كل ما يحدث لنا من كوارث خلفه طابور طويل من الخائنين المأجورين
العملاء فالامر ابسط من ذلك..لأنك لو دققت النظر اليهم جيدا سترى ان اذانهم طويلة جدا
على ان يكونوا عملاء ؟؟!!
***************************
اغانى
المهرجانات - اوكا واورتيجا ستايل - تدفع الانسان دفعا للاستغراق فى نوبات حنين الى
الماضى ...لكنها هنا قد تكون اكثر من اللازم فتدفع بك الى حدود البدايات والنشوء حيث
اصل الانسان...قرد ؟؟!!!!!
**************************
اميل
جدا لتصديق نظرية الناس معادن ومن المعروف ان المعادن النفيسة بالغة الندرة فالالماس
لايقارن بالصفيح المصدى اللى هيطفح فى شوارع مصر والسؤال للاذكياء هنا كيف يمكن لنا
اعادة تدوير هذه المخلفات وتحويلها لشىء مفيد حتى ولو صفايح زبالة ؟؟؟!!
***************************
بقول
لواحد صاحبى الراجل ده هيموت ويطول أى منصب فقالى ده ماسموش حب للكرسى ده اسمه شبق
للكرسى قولتلة فعلا الراجل ده من يومه عنده شبق وبقدونس !!!
تخاريف بقلم د.وائل موسى غيث
