رائعة شاعر الثورة هشام الجخ مكملين

رائعة شاعر الثورة هشام الجخ
مكملين
للي مش فاهمين نزولنا .. للي معاشوش ظلمنا ولا قهرنا وحسوش نزولنا
للى مداقوش مر جوعنا .. اللى ماناموش فى الشوارع كالدبايح
كملوا فى الليل عشاهم م الصفايح ..
للى مش فاهمين مهانة الرجال
قهر الرجال ..
للى بيقولوا علينا اننا حبة عيال ..
احنــا مش حبة عيال.
**********************
احنا شوفنا النيل بينشف فى البيوت
واما يجرى …
يتفرش حمام سباحة فى قصر باشا
مستكترين فيا الغضب ..
مانا كنت غرقان فى البشاشه
كنت راضى ببوق مايه واقول دى هنا
كنت ببكى فى القصايد ..
كنت بشتم فى القصايد..
تتقطع ايدى اما قولت حبيبتى ماتت
***************************
للى مش فهمين نزولنا فى الشوارع ..
إحنا بندور على الحلم اللى ضايع ..
إحنا جرينا النفس فى عروق عيالنــا
يكبروا فاهمين حاجات مافهمنهاش..
اقبل أنى اعيش عشان حلم وقضيه
بس ماقبلشى انى عمرى يضيع بلاش
ما احنا سيبنلكوا البلد مانصفتوهاش
*************************
ماتلوموش على اللى اتعجبن فى المعجنه واللى اتظلم
واذا كنتوا فاكرينا غنمـ .. على رزقكم أنا جِدْى فاق
فاكرين زمان حذرتكم
مستنى ايه من طفل رَبُّوه بالزعاق
غير المشاكل والخناق
لَذَا كنتوا فاكرينا غنم
على رزقكم أنا جِدْى فاق
****************************
للى مش فاهمين نزولنا فى الشورع ..
الحكومة عودتنا على الشوارع
بيتتنا فى الشوارع
نيمتنا فى الشوارع
الحكومة سكرت على نفسها كل البيبان
خوفتنا من البيبان ..
فاترمينا كلنا فى حضن الشوارع
اكتر مكان لقيناه امان ..
اللى خايفين على البلد لحسن تموت
ماتخافووووش
الموت سكوت ..
واحنا مش فى الخطة أصلا ان بكرة يكون سكوت ..
احنا شايلين حملنا ومكملين ..
بكرة بيشاور علينا واحنا مش مستعجلين
مااحنا لينا كام سنه متقندلين
صابحين فى طين .. نايمين فى طين
احنا بنأسس بلد تسمع شكاوى المظلومين
نشتغل نلقى عرقنا قصاد عنينا
مش فى جيب النصابين
نشتكى نلقى اللى يسمع شكوه الناس الغلابه الطيبين
احنا بنشكل بلد لاهى خايفة من صوت الاذان ولا خايفة من إن الكنائس تتبنى
احنا بنأسس وطن عافيان غنى
مش وطن يخدم 15 نفر ويبات جعان
احنا مش عاوزين وطن مهزوز مهان
"المصرى مش لايقة عليه كلمة مهان"
*******************
يقولك احنا عملنا فوضى
احنا بردوا عملنا فوضى !!
احنا كنا بنتجلد ونعيش ونرضى
واحنا كنا بنتسرق ونعيش ونرضى
كانت الاسعار بتغلى وكنت برضى
والشرطة بتفتشنى عااادى
فى اى وقت فى اى حته وبدون مناسبة
وكنت برضى
والانتخاب من سن كام لسن كام "معرفشى ليه"
وكنت برضى
جاى النهاردة تقولى احنا عملنا فوضى
طب فوضى فوضى
*********************
ماسورة الغاز بتقفلها لصعيد بلدك وتل ابيب بتفتحها
مسورة الغاز بتقفلها على ولادك وللأعداء بتفتحها
وناس شقيانه طول اليوم عشان لقمه ..
وغالى ياخدها على الجاهز .. اللهى يارب يطفحهــا
وناس تسكن قصور بتدور .. وناس الجوع بيدبحها
وناس بتموت فى الميادين فدى الثوره …
وناس خايفة على مشاعره لنجرحهاااا
********************
احنا هانكمل وهانزق البيبان
يارب أنت المستعان
واللى بيقولوا علينا مغيبين ومسطحين
وبوابين ومعفنين ومنتنين ومأجورين
قولوا براحتكوا .. احنا بردوا مؤدبين
ومسالمين
بس إحنا بردوا "مكملين"