تخاريف من نفسى

ياسلام بقى على مراية ذى مراية مرات أبو سنو وايت اللي بتجاوب على الأسئلة دى والواحد يقعد يفضفض معاها ومستحيل طبعا انى هاسألها من احلى منى والا هكون باستهبل وش بس انا هاسألها اسئلة لولبية من نوعية حكم العسكر ده هينتهى امتى ؟ من هيكون رئيس مصر الجديد ؟ فين بيستخبى الطرف التالت بعد كل عملة سودا ؟ امتى الزمالك هياخد الدوري ؟؟ وهأعذر المراية جدا لو جالها سرطان من اللى بيجى لقزاز العربيات

******************************************

لدينا بعض المسئولين لو ضربوا بالنعال على فسادهم وخيبتهم لواجهتنا النعال باكبر حركة عصيان مدنى فى التاريخ

******************************************

نحمل كمسلمين عشقا خاصا لسيدنا عمر بن الخطاب لا لشىء سوى انه كان يمتلك شعورا رهيبا بالمسئولية وزعه على رعيته بانصاف بديع

******************************************

العدل هو قلب الايمان لذا ترى كثيرين فى مجتماعتنا متدينين شكلا مفتقدين تماما للمضمون لان موازين العدل لديهم شابها جنوح او اختلال

******************************************

صاحب الهوى لايمكن ان يكون صاحب قرار..لان اتخاذ القرار السليم يستلزمه التركيز و عدم الزيغ لمصلحة ما والا اصبح القرار عديما فاسدا مطعونا فى نواياه

******************************************

ليست بالكثرة.. الوطنى المحترم صاحب الموقف الصلب الصادق سيكون تأثيره اقوي وأعمق من جوقة الأغنام التى تصخب لاى ايمائه من عصاه الراعى

******************************************

حينما يتهم احدا كمصطفى بكرى الدكتور محمد البرادعى بالعمالة فيصفق القطيع دون تبيان او دليل اشعر بانى عايز أغير جنسيتى والجأ سياسيا لبوركينا فاسو

******************************************

نواب البرلمان هم اختياراتنا للأسف،، لذا اتمنى ان يعلم الجميع انك تحصد ما زرعت يديك فى صناديق الانتخاب ..وكنتى فين يا لأ لما قلت أه

******************************************

جعلونا دولة هشة فى كل شيء نظام،مؤسسات،اقتصاد،أمن،تعليم،حتى سلوكياتنا وللخروج من تلك الحالة سنعانى حتى نتكيف مع الخواء الرهيب ونختار طريقنا

******************************************

لما رجل دين وداعية يقول الالتراس اللى ماتوا دول لما يقابلوا ربنا هيقولوله أيه ؟؟ كنا بنشجع كورة ؟ متهكما على القتيل متحاشيا الإشارة للقاتل نستطيع ان نتبصر بوضوح كم قد يسبب هذا السطحي الأجوف من إساءة للدين وعزوفا للبسطاء عن بضاعته المنكوبة التي ألقتها الظروف التعيسة في طريقة الموحل.. ******************************************

وعشق الوطن مالوش أخر لكن عشق الكرسي فانى..ولو الكرسي بينفع كان نفع أبو علاء بس هم فين العقلاء واخد بالك انت ياحاج فاسو..

******************************************

وستعلو مصر وشعبها بأذن الله على كل ما يحاك لها فى الظلام لا لشىء سوى ان المولى عز وجل لا يصلح عمل المفسدين..
******************************************

نفسنا فى شوية دم من بتوع اليابانيين اللى بينتحروا هاريكارى عند الشعور بالتقصير نوزعهم على مسئولينا يمكن حد فيهم يحس بالذنب ويضرب نفسة ثلاتين جزمة -مع اسفى الشديد للجزم-

******************************************

ستنجح الثورة ايضا حينما نشتغل لنعاون بعض ونتوقف عن ان نشتغل بعض وماحدش يقولى نشتغل بعض ليه هو احنا بلوفرات

******************************************

مصر أم الدنيا رحاية عتيقة ياما طحنت هكسوس وفرس وبطالمة ورومان وفرنجة ومماليك وفرنساويين وانجليز ويهود وغيرة وشربت حروب وغزوات ومؤامرات وظلم وفتن على فتن مالها أول ولا أخر ومضغت بسنانها كمان بعدد السنين ظلمة ومنتفعين وسماسرة وجبارين وطواغيت وعملا على كل صنف ولون ما اتأثرت ولا اتغيرت ولا اهتزت وداست على كل الصعب بخطوات تقيلة ورزينة بكل عزة وشمم وما حفظت يوم فى قلبها الصافي ذكرى غير للى حبوها بصدق بدون غرض شالتهم فى عنيها وعلى رأسها الأبى المرفوع حبات زمرد تزين جبينها اللى عمره ماعرف معنى الانكسار

د. وائل موسى غيث